記一次難忘的炒散之後冇得返最後喺東涌睇戲有感

       尋日冇寫到blog，因為真係冇咩特別事發生，今日就真係值得一寫。本來今日係返工日，而且仲係返早，由朝早九點返到下晝六點，於是晨我就咁早起身，約左一個朋友八點幾喺欣澳等，結果少有地佢好準時，同我同一時間到(哈，係呀，我不嬲好準時)，仲諗住今日終於可以返多日工，好讓我應付之後出嗰幾隻大作(PS3 game)，點知，原來個蛇頭搞錯左，今日係冇我哋份㗎，就係咁，半日嘅東涌之旅就咁開始左啦。
       晨早搭直通車去東涌會所，唔夠一陣又要去車站等車出返去，唉，冇得返都算啦，但係點知諗住搭返直通車返去都等左一個鐘。話說嗰度一班車都要等三十分鐘，我哋喺嗰度等左半個鐘之後，終於有一架車黎，但係發現架車寫嘅目的地唔啱，所以冇上。再過左十五分鐘，我哋開始有少少懷疑係咪真係有車，諗左一陣，我哋發現啱啱嗰架就係我哋想搭嗰架巴士，個司機唔鬼記得左較返個目的地係東涌，唉，結果我哋就坐左喺巴士站一粒鐘。
       到左東涌，又唔想咁快返屋企，如果唔係覺得白白黎東涌，結果就决定左一齊睇戲(冇錯，未工作先洗錢)，時間啱啱好嘅就有我想睇嗰套名瞞戇族，呢套係一套笑片，之前睇預告片就諗住要down……咳咳……唔係，係睇。入左戲院睇，先覺得好彩冇錯過呢套戲，果然係一套好片，笑位好多，令我完全唔記得今朝發生嘅事，我特別鐘意戲裏面嗰個傻仔，之前喺其他電影冇見過佢，但係喺呢套戲佢已經俾左好深印象我。睇完呢套戲之後我覺得，有時笑片真係要戲院睇先好，一班人笑好過一個笑，我啱啱睇緊嘅時候覺得，影院入面嘅每個觀眾嘅情感都連埋一齊，一個人笑會感染到其他人一齊笑，有d位一個人睇應該唔會笑得咁開心，突然覺得大家都好接近。
       睇完戲，我哋兩個女人(有選擇困難)行黎行去，最後終於喺翠華食左我哋嘅午餐，咁樣東涌半日遊就咁完左啦。就等我期待下今日仲會發生咩事啦！
      

短短文一篇

       今晚遲左打blog，係因為難得媽咪夜晚出去食飯，得我同細路喺屋企，當然就偷打機啦！！都算係我同細路嘅親子活動，就係咁，其實今日隨左偷打機呢件重大嘅事之外，就冇其他係值得講㗎啦……好啦！今日就咁完啦，我仲要殺埋嗰個恐怖份……唔係，我訓覺lu……

細路表示：白飯真係冇咩味

       尋日返工，本來會喺搭巴士返屋企嘅時候打blog，但係因為隔離有人，所以我就唔好意思打啦，就喺今日補返啦。
       尋日返工其實冇咩特別事發生，如果要講，就係我覺得個經理開始記得我啦，佢多左同我講嘢，可能因為我近排返得密(其實都係兩日)。尋日係做酒會，活動大概兩個鐘到，全程拎住四隻酒杯行黎行去，真係好攰，廿九號我會再返，希望唔好再係酒會啦。
       返工嘅嘢就講到咁，或者我就講下其他嘢啦。呢排我開始覺得一個人幾好，唔係講緊拍拖嗰d嘢，而係有時返工放工返學放學嘅時候，尤其是夜晚，因為我好享受一個人嘅時候聽住音樂，諗下嘢。唔係扮緊浪子，而係有時要同隔離個人硬要搵話題真係好辛苦，更甚嘅係有時嗰個人真係同你唔係好熟，但基於禮貌，我覺得唔可以行埋一齊但係都帶住耳機，搞到冇話題嘅時候，又好辛苦，所以我寧願一個人。
       尋晚巴士嗰程好彩隔離嘅同我都有相同話題，雖然我會鐘意一個人搭車多d，但一個幾鐘嘅車程中間都唔會冇話題，所以都唔係好緊要。
       今日就講到呢度，我已經開始睇人間失格，有望不久嘅將來可以有第二篇讀後感(好官方)。
     
      

大亨小傳讀，觀後感（電影and小說），第一次自願寫的閱讀報告

       既然今天是讀後感和觀後感，那就用書面語吧。昨晚睡前一口氣讀完大亨小傳的翻譯小說，所以今天就以我之前看完的電影和昨晚看完的書做一個感想。其實大亨小傳這個故事我是先看電影版再看小說的，這樣做好壞參半（閱讀報告總要用一點成語，可能這樣顯得更專業），詳細下面才說。為什麼先看電影呢？因為我之前沒有聽過這個故事，看過電影後才決定買書，買書後才知這是世界名著，大亨小傳在香港也沒什麼名氣，至少在我這一代沒有，老實說我看電影的原因是因為李安納多，他近年的電影我都有看，他的演技確實不是蓋的。這一次看大亨小傳，除了他的演技，他扮演的角色和演出的故事都令我十分深刻，深深吸引著我，我就下定決心要買這個故事的小說。
       先說故事簡介，雖然電影和書本有點不同，但情節大至是相同的。故事以一個剛從大學畢業，初到社會工作名叫尼克的男生作第一身敘述。他到了夢想的紐約，認識了住在隔離大屋的大亨蓋茲比。他每個週末都邀請各地的人來他家參加派對，但其實這些賓客絕大部分不了解這位屋主，甚至有些連他長得怎麼都不知道。除著故事發展，尼克逐漸了解蓋茲比，知道他的這些派對只是為了一個少少的夢想，為了見到對岸他一直深愛著的黛西，一直希望她會參加週末的派對，好讓蓋茲比實現他的夢想。最後，他的一切終究只是幻想，一直希望著的美夢也換來杯具（悲劇）。
       看完電影才看書有什麼情況出現呢？其實這樣做會有先入為主的概念，看書其中一個吸引之處就是書中的一詞一句都給了你幻想的空間，如果你先看電影就會將電影的情節角色套進你的書本裏，也就很很難有幻想了。不過這次我其實沒有後悔，因為第一不知是否翻譯本，還是文學句子太難明白的原因，有些小說情節我必須回想電影情節才明白，在看這本小說的過程中，改篇電影也在我的腦海裏播了一次，解釋我書本裏不明白的地方。第二就是里安納多演活了蓋茲比這個角色，我看書的其中一個原因是對他演的這個角色的性格很有興趣，全靠他的演技，令我想與蓋茲比有更深的認識，對「他」有更深了解。如果你問我看書會否感到很沒趣，因為在電影已經交代了大致的情節與結局；我會回答不會。其實書本與電影有互補不足的功用，兩個都看完令我腦海裏的大亨小傳變得更完整。
       電影因為時間限制而沒有辦法完全交代書本內容，而且不同於文學小說，看電影的人可能有一部分是不常看這些文學改篇電影的，所以除了要令電影滿足觀眾眼球外，也要讓故事變得更容易理解。兩個半小時的電影用了大概半小時帶出大屋派對的華麗感，所以一開頭的書本情節都在電影裏很快就交代了，直到後來才將情節放慢，但仍有書本情節被刪減，畢竟電影不能將二百多頁的書本內容都交代出來，因為這樣作者想帶出的意思也變得難找了。不過電影加強刻劃了蓋茲比的性格特徵，也令結局變得更樂觀，其實我較喜歡電影裏的蓋茲比，因為電影裏的他一直抱著希望，在死前的一刻都相信電話是黛西打來的，相反作者在書本沒有刻劃太多蓋茲比的這個性格，希望是令人一直活下去的一種動力，電影中的蓋茲比就給了我這個信息。另外書本與電影不同的就是書本更容易讓我得到作者想從大亨小傳帶出來的信息，就是一個人的本性是不容易改變的，你屬於哪個階層，就很難在短時間改變，例如蓋茲比本來就是一個屬於低下階層的人，就算怎樣改變，本質還是不會因為他表面的改變而變得更高階層。其實電影亦有盡量表達出來，例如在故事的高潮位蓋茲比因按捺不住湯姆揭開他的身世而瘋了似的大喊湯姆收聲，一蓋之前扮演的紳士形象，但是可能我太笨，單靠這些位置我實在很難理解，書本中作者加了一些形容，令這個寓意更突出。書本與電影的最後一句：「我們就這樣揚著帆迂迴前進，逆水行舟，而浪潮奔流不歇，又不停將我們推向過去。」應該就是表達這個意思。
        一個兩個本小時的電影和一個二百多頁的故事其實可能有多從意義，電影與書本同時帶給我的信息就是身邊真正的朋友其實很少。我看電影時已經深深明白這個道理，只不過書本從更多情節加強了這個寓意。雖然每一個週末都有很多人參加蓋茲比的派對，但他們根本不在意蓋茲比是什麼人，不了解他，也不會因為他遇到什麼事而覺得難過或快樂，甚至對他作胡亂猜測，他們只會在意派對還有多久就完，下一個週末還有沒有，來參加蓋茲比派對的根本就算不上是他的朋友，頂多只是一個普通的客人。當蓋茲比死後，沒有一個人願意去他的喪禮，儘管尼克一直聯絡之前與蓋茲比有過一點關係的人，但也沒有一個人會抽空出席他的「最後派對」。書本中用了比電影更多的時間形容尼克邀請人的情節，但最後結果也是只有一場空。在喪禮當日其中一個賓客出現了，他甚至沒有收到尼克的電話，也願意成為其中一個送別蓋茲比的人，證明朋友不是靠你到處找就能找到的，真正的朋友就算你沒有做任何事，他們也會在你需要他們的時候出現，幫助你，陪伴你，給你希望。
        以上只是我的個人觀點，我也沒想過我會在中學生涯過後仍寫這麼長篇的閱讀報告，其實與其說是閱讀報告，我只是將我對書本的想法寫出來，抒發心中所想，老實說昨晚看完書後，心裏一直不太舒服，在這裏寫了出來後，總算放下心頭大石。在這裏我推薦大亨小傳這部電影和這本書，我已經很久沒有看完一整本小說了……今天好像寫得太多了，明天再見吧！

多啦A夢

       今日係一日好矛盾嘅日子，呢個颱風喺朝早九點二十分落左，所以學生唔洗返，但係對於要返工嘅上班族黎講就真係極慘，當佢哋以為唔洗返嘅時候，結果天文台就喺九點二十分打破佢哋嘅夢，有d人尋晚仲玩得好high，以為今日唔洗返，嗰d人仲慘。不過對於我黎講呢個颱風落唔落真係冇咩意義，因為我今日又係放假。
       今日係平日，所以我就落左去健身，我發現睇住多啦A夢跑時間過得特別快，我今日較住7.5速度跑，不知不覺就跑左半個鐘，特別有滿足感。
      

八號風的星期天

       嗯……今日天兔正式打黎啦，喺下晝掛起左八號風球，我細路仲怪個風太快掛，聽日可能要返學，我諗依家全部人都希望緊聽日可以keep住掛八號啦，咁又可以放多日假。我就希望快d落啦，我啱啱先知有個朋友仲喺酒店返緊工，希望佢有車返屋企啦。
       今日老豆唔喺度，所以我成日都覺得今日唔係星期日，有d唔習慣。嗯……我好似已經詞窮啦，不如今日就咁完啦，我仲可以喺訓之前用d時間睇書。
      

天兔

       颱風“天兔“就快打黎，所以今日真係焗到喊出黎，呀樂仲出左去海灘bbq，真係極大膽！比著我真係唔敢，其實我會睇下有邊個去啦，之後再考慮下，講講下自己喺度ff。
       講返我，今日上左最後一堂customer service，一堂用左黎講書，另一堂用黎問我哋功課，一開始都好地地，有幾個人出左去問嘢，之後冇人嘅時候，佢就開始叫人出去問嘢啦。其實我都估到會問到我，所以我之前已經準備左幾條問題要佢答，唔俾空間佢問我功課做到邊，結果佢真係落堂前最後一刻叫我出去，我咁多問題佢緊係冇時間問我功課做到邊啦，但係佢話好期待我份功課，因為覺得我應該會做得幾好，搞到我唔止有壓力，仲有少少唔好意思，睇黎呢兩日要開始做啦！講住先。

走過鋼珠路軌

       今日係紅日，成家都放假，全香港都放假，正因為咁，我哋早午晚餐都係喺安靜嘅屋企食，至於今日做左咩，就係終於搞掂左我之前送係細路嘅過山車啦！！
       經過四晚嘅工程，今日終於砌好，雖然有時碌粒珠落路軌都會跌出黎，但大部分次數都係成功行到一圈嘅！！咁所以就，我哋就當成功啦。今次可以話係我同細路打娘胎以來最大嘅合作工程，完成嗰時真係極有成功感，我感覺到我同細路嘅關係都好左！可能只係我心理作用，不過砌嘅途中可以話一波三折，搞掂一個位，原本嗰個位又出問題，搞左鬼咁耐，鬼咁耐即係幾耐？四晚掛，因為我搞左四晚。就係咁，一條完美(?)嘅太空軌道過山車鋼珠路軌就咁搞掂啦！(其實呢條只係level 3，唔知level 9 係點㗎呢？)
  

月餅節快樂

        今日係中秋節，講聲中秋快樂先！！咁特別嘅日子，我就緊係又係留左喺屋企啦，冇出去玩，除左下晝同爸媽去左打邊爐，我發現三人同行一人免費，原來得將軍澳呢間分店有，真係幸運，係中秋節最好嘅消息。
       我成日留喺屋企做咩，其實我喺度同細路研究之前生日送俾佢嘅太空軌道，今晚已經係第三晚砌，本想一日搞掂嘅嘢結果搞左三晚……都未搞掂，真係砌到極沮喪，尤其是個三百六十度灣位，搞左我哋成晚……都未搞掂。結果就係，聽日先算lu，正所謂，希望在明天嘛。

五香肉丁炒飯

       今日又係一日假期，我學校真係勁多假，有時真係搞到我好想返學。由於我唔想再浪費時間喺一日假期度，同埋功課又未做完，所以我就决定左落去剪頭髮。同功課未做完有咩關係？冇㗎，純粹講下之嘛。
       講起剪頭髮，我以前真幾抗拒剪頭髮，我諗唔止我，好多人以前都唔捨得同佢d頭髮分開，緊係啦，我當佢哋係朋友咁㗎，點可以話分開就分開，名都幫佢哋改哂，頭髮一，頭髮二，左頭髮一，右頭髮三……後黎大個左，頭髮話剪就剪，冇任何嘅留戀，可能……我已經成熟啦。
       剪完頭髮，就一個人去左街市食炒飯，雖然咁係食火腩飯，但都覺得有一種男人嘅浪……費，係呀，因為我竟然食唔哂個飯。
       其實食飯嗰時令我最深刻嘅係，我見到有對差唔多年齡嘅c奶朋友，其中一個喺度分享食物俾另一個食，雖然另一個話自己食唔落，一直話唔要啦唔要啦，但都令我感覺有d窩心。令我諗起我之後樓下街市就執，有個c奶去魚檔買嘢，但係唔記得帶錢，個老闆話“唔緊要啦，你遲d再落黎俾返我啦。“我覺得個老闆已經唔擔心佢會唔會收得返d錢，因為佢哋彼此講嘅係一種信任。有時我會覺得，雖然街市d嘢食唔係咁好食，甚至整體俾人嘅感覺唔好，但係喺裏面可以見到出面見唔到嘅嘢，可能就係街市裏面嘅人情味，令佢成為一個外面社會嘅避風港。

細路生日驚險旅程

       因為今日係細路生日，所以我晨咁早我就出左去，嗯……晨咁早係幾點？大概十二點啦。我十二點晨咁早就出左去，因為點半要上堂所以衝左去拎貨就衝返學。結果都係遲左少少，咁就破左我二零一三年九月十七號唔遲到嘅記錄，唔緊要啦，記錄，不就是用來打破的嗎？
       至於放左學之後就即刻衝返屋企陪細路食飯，順便喺搭地鐵途中打左一局火超金，先發現原來我第一次跌火超金。講返食晚飯，我哋最後去左元氣食壽司，除左發現裏面播緊AKB嘅歌，仲發現原來d嘢唔係幾好食，d飯好散，豆腐有d酸。不過元氣出左個會員大募集，要喺六十二日裏面儲齊九百蚊，個儲分app嘅界面有d似打機升lv，幾得意。
       所以，今日真係十分驚險。

好彩記得！！

       哇！差d就唔記得寫blog，我家陣就睇住達哥寫住blog。要講今日發生左咩事，其實冇咩。今日唔洗返學，結果都係留喺屋冇所事事。
       講起今日下晝我煮左個芝士公仔麵食，因為我太肚餓，所以加多左半個出前一丁，由於我係煮撈麵，唔加湯，結果煮左出黎成堆嘢，而且唔同色(因為裏面有出前一丁同公仔麵)。味道亦都……嗯……真係May姐食左都笑唔出黎。正當我怕怕地呢個芝士麵嘅時候，媽咪就買多左兩pack芝士麵返黎，一諗到我嘅未來就……
       好似平時咁，我落左去健身室個跑步機度跑，咁啱喺跑步機部電視睇到新嘅多啦a夢，雖然故事一樣，但係感覺已經唔同左，會諗“點解佢唔咁做呀？多啦a夢用呢個發寶咪得囉。“可能人大個左睇返d以前嘅卡通真係唔同d。咁唔知以前爸爸媽媽係用咩心態陪我哋睇呢？

歡樂的週末

       今日係星期日，好似平時咁我又係留喺屋企無所事事，諗下香港發展方向，諗下點改善經濟，不過亦同平時一樣，冇結果。
       明明今日大把時間可以做功課，但係冇咩心機做，寧願坐喺度反思人生都冇落手做功課，究竟出左咩問題？呢d其實就係人類嘅惰性，講到惰性呢，我哋又可以講下點解人會有呢種天性呢，其實就係大惱……
       我講左咁多相信大家都明㗎啦，咁我都唔再講……睇黎我連寫blog都冇咩心機，其實我想知blog係咪要日日更新先好，定係不定期更新，又或者好似漫畫咁每星期出一集，有時休刊，甚至月刊，年刊，季刊，分鐘刊，秒刊，一週刊……
       就係咁，一日咁就過左去，我望住隻蠟筆小新，又開始思考人生。

點擊以命名文章

      今日係人力資源最後一堂，除左講書之外，俾功課老師睇之後佢再俾comment我哋都係另一個重要環節，講到功課，我哋男仔多數都未開始做，每次聽到個老師講“相信你哋都做到七七八八“都會搞到我哋心都離一離，好彩班裏面都有一部分係乖嘅，會俾個老師俾comment加zip時間，但係我哋心理上都會有d唔舒服，可能……因為我哋對功課都有份執著。……講笑。
        反正今日係最後一堂，就講下個老師，我最佩服佢嘅係佢嗰種專業精神，有時返早嘅時候個個訓哂教，又或者個個喺度傾計冇聽書，佢都可以講住笑同時講快書，自得其樂，唔係串佢，而係我真係覺得佢真係好厲害，好專業，唔容易俾外在環境影響。仲有，以佢講嘢嘅速度，我覺得佢除左做老師仲可以做嗰d街頭小販。“哇各位真係唔試唔知好抵用，平時出面賣三九八一支我呢度盡量平……“佢嘅講嘢速度再加上一支麥克風，即刻變成女人街嘅小販呀明。(唔洗考究係邊個，因為個名係我作嘅。)
       

極速巴士

       好耐冇返“抄散“，今日接到個船河自助餐更，聽個fd講冇咩嘢做，咪返下囉，一開頭返到去真係好hea，坐下坐下搬下搬下又過幾個鐘，之後先知原來係老闆娘生日搞party，得我同個fd兩個“抄散“，算！心諗隻船咁細好易搞姐，點知最恐怖喺後面。
       去到五點幾我哋工作人員先上船，發現隻船成隻“黑珍珠號“咁，唔係講緊個外形好似好氣勢同船上面真係有班船員好有形，而係唔同遊艇咁有得“姐“頭(我對遊艇嘅觀念係從tvbb得黎㗎)，太陽幫我消脂，算！party夜晚開始應該冇咁曬，點知曬完就好大浪，搞到隻船搖到麥旋風咁，班客就坐哂喺度，難為我哋就行黎行去遞黎遞去，搞到鬼咁暈，又好想嘔。成程船我等緊有其中一個客嘔落地下，咁我就可以名正言順嘔出黎，因為一個嘔一定搞到其他人一齊嘔，到時多一個唔多啦。但係最後冇，佢哋竟然用嘔吐袋！咁我就忍左幾個鐘，好彩最後有好嘢食，咁就冇咁暈lu。
       仲有！我想講嘅就係個維港八點嗰個幻彩光光光(唔記得個名啦)，哇！冇睇過唔知，原來佢係搵左幾個人喺幾幢大廈上面拎住個電筒照個天，所以得幾條白色光柱射住個天，應該就係咁樣做左十五分鐘啦。呀仲有！仲有音樂，一開始我仲同個fd講呢d係前奏，點鬼知音樂一完連幾條通天電光都冇埋，咁我就知咩事啦。
       講左咁多衰嘢，其實我覺得今日真係一日好好嘅經歴，一生人可以搭幾多次“黑珍珠號“，真係好少，所以我唔後悔今日上左船，係後悔報左更姐，講笑，今日就講到呢度啦。
       呀！總結，今日架巴士好極速。

序

       今日，我重新開始寫blog，點解？冇點解嘅，因為我突然諗到呢個除左影相外可以留返低d野嘅地方，其實冇人問點解，只係我假設有人問，咁我可以答下，有d野寫。如果真係要講點解嘅話真係要講好耐，一匹好長嘅布咁長（係咪好廢，唔知依家d學生會唔會咁充字數），所以就唔喺第一段/introduction寫啦，講開又講點解第一段一定要係intro，其實可唔可以放喺第二度，甚至唔寫。講返正題，重新寫blog嘅原因就喺下面寫返啦。
       話說我幾日前用左張一百蚊嘅書卷買左兩本書，一本係大亨小傳原著小說，另一本係達哥（唔識佢可以上google查，係呀，我一d都唔reader-friendly架……算啦，佢係一個實況遊戲評述家，逢星期一至五9:30喺網上開台，我哋就一邊睇一邊喺隔離留言，所謂嘅同達哥互動咁囉）介紹嘅人間失格，而且我用左一張免費電影票一個人睇左激戰，由於我未睇完本書，所以今日嘅主題就係講下呢套激戰，咪著，篇文章好似出左d問題，係咩呢？……Oh！今日嘅blog點會講返之前d野嘅，因為我今日好普通囉（設問句）。係啦，就講激戰，本來我唔太鐘意去戲院睇港產片，因為我覺得一樣價錢嘅hollywood片會抵d。點知朋友又係咁叫我睇激戰，反正又免費，我就去左睇啦。嗯……係囉……好好睇……嗯……我覺得要練到佢哋咁真係好難……係囉……拳拳到肉呀……不如完啦，我冇野寫啦，好！就咁！ 所以，我就重新開始寫blog啦。
Q.1 文章主旨是？