大雄！我真係要走啦

        今日，多啦a夢隨大雄去了。
        林保全喺2015年嘅第二日離開左我哋，離開左全部香港人。說實話今日聽到呢個消息嗰刻只係覺得好突然，未算太難過，因為我都已經有幾年冇睇到多啦a夢。直到夜晚喺網上不斷睇到以前佢配音嘅多啦a夢片段，聽到佢好難被取代嘅聲音，就慢慢諗返起我睇過佢配音嘅一d角色。
        除左多啦a夢，最令我深刻嘅就莫過於數碼暴龍嘅甲蟲獸：“光子朗！光子朗！“相信有好多九十後嘅人都同我一樣記得佢喺數碼暴龍裏面嘅呢把聲。另外，佢原來仲配過龍珠裏面嘅悟空，高達裏面嘅啊寶，星矢裏面嘅紫龍等等。
        今日回憶返嘅唔止係林保全配過音嘅角色，仲有以前睇多啦a夢嘅片段，當年充滿童真嘅我哋。只可以話時間過得好快，林保全陪伴左兩個世代嘅香港人，佢永遠都係老一代心目中嘅叮噹，年輕一代心目中嘅多啦a夢，而同時我哋係佢身邊嘅大雄。

"Should we get some coffee?" "Sure…where?"

“如果仲有時間嘅話，不如再去一齊飲杯咖啡。”今日係老友記二十週年，呢個荒廢多時嘅blog最後都係要更新，原因都係因為老友記。

老友記係一套廿四分鍾嘅情景電視劇，總共十季，每季大概廿六分鐘到，由1994年播到2004年，陪伴觀眾走左十年。故事圍繞六個好朋友或者室友嘅日常生活甚至感情發展。十季嘅故事主要發生喺兩個主要嘅場景：咖啡廳同莫尼卡屋企。

記得第一次接觸老友記係半年前，大結局都播完大概九年。當時係為左消磨時間，覺得老友記一集得廿四分鐘，就上網開黎睇下，同呢套電視劇嘅感情都係由嗰日開始陪養。咁樣講可能有少少誇張，但作為一套十季嘅電視劇，觀眾難免都會同電視裏面嘅角色產生感情，會同佢哋一齊唔開心，一齊開心，一齊喊，一齊笑，會因為Monica同Chandle終於要搬屋而唔捨得。例如直到依家，仍然有市民見到珍妮花會叫佢瑞秋。大家對老友記嘅感情即使喺佢大結局之後咁多年都冇變過，可見佢已經成為大家心中最經典嘅電視劇。

“當你唔開心嘅時候，就睇老友記啦。”作為一套處景電視劇，最緊要製造出輕鬆嘅氣氛，令每一個啱啱工作完返到屋企嘅觀眾都容易投入喺當中。呢套劇不乏令人捧腹大笑同會心微笑嘅內容，就算喺緊張嘅劇情當中都不忘加插搞笑情節，營造出緊張情節之餘亦都用左搞笑黎平衡氣氛。尤其當中嘅現場觀眾笑聲更加令觀眾客易掌握劇中笑位。

另一個情景劇嘅重點就係令觀眾覺得感同身受，有代入感。十季嘅劇情裏面經歷左十個聖誕節，十個新年，多過十次嘅角色生日派對，但仍然不缺新鮮感，因為日常生活裏面實在太多事可以發生啦，只係導演編劇留意到呢d事，再加創意將呢d日常事放大，就變成依家嘅老友記。我作為一個香港嘅觀眾，都可以睇得咁投入，咁都不難想像當地觀眾會有幾多認同感。

講到代入感，我喺Chandle身上見到我嘅影子。呢套劇裏面六個角色都有好鮮名嘅性格，而Chandle嘅性格就令我最為熟悉，佢經常用笑話諷刺其他人黎蓋住自己嘅冇自信，而且經常喺唔啱嘅時候講笑，更甚嘅係喺故事一開頭佢係一個完全唔想負起責任嘅男人，呢個都係點解佢會成日俾其他人認為係同性戀。我喺呢個角色身上搵到自己，透過睇住佢喺十季中嘅成長，我都嘗試改變自己。

近日老友記中嘅六位角色因為二十周年再次眾埋一齊，拍左幾張相，睇到佢哋大家個樣都老左好多。但對於我哋黎講，佢哋仍然係
當年嘅Chandle, Joey, Ross, Rachael, Monica同Phoebe。

寫到呢度我諗起當年嘅最後一句對白同最後一個笑話：“如果有時間嘅話，不如再去一齊飲杯咖啡” “好呀……去邊飲？” 六個角色其實都知去邊飲，每個睇開嘅觀眾亦都係，播出左咁多年，呢個笑話變成左最後嘅告別，隨即老友記經典嘅片尾曲(主題曲)就響起啦……

一套俾大人睇嘅小朋友動畫

好耐冇寫過blog，啱啱睇左一套戲令我忍唔住想分享下，佢係disneyland嘅wall-e，簡單咁講，佢係一套俾大人睇嘅小朋友片。

故事大概係講一個收集垃圾嘅機械人威e，佢生存喺已經嚴重污染而且已經冇人類居住嘅地球上面，所有人類喺七百年前已經搬左上一㗎太空船上面，而且一直生活到依家。故事就由太空船派落地球嘅生命檢測機械人伊娃開始。一直自己一個生活嘅威e見到有另一個機械人落到黎，開始接近佢，關注佢，慢慢兩個人嘅關係變得好好，威e都逐漸鐘意左另一個機械人。就喺無意中伊娃喺荒涼嘅地球上面發現左有生命嘅植物，佢哋兩個就因為咁上返宇宙船再通知其他人。

成個故事十分吸引，單係題材已經同其他動畫好唔同，兩個主角基本上係唔識講嘢，只係靠住動作同少少聲音黎表達兩人情緒同諗法，係一個大膽嘅嘗試，如果要採用個唔識講嘢嘅主角，拍攝手法變得更加重要，動畫嘅頭半個鐘其實都冇人講嘢，但由遠鏡拍攝佢習慣地行一大段路，喺壞左嘅同伴身上拆走零件同周圍嘅寂靜，已經令我感受到威e得自己一個生活，生活漫冇目的嘅寂寞。

故事帶出黎嘅道理好多，包括愛冇分限介，一個係最新嘅機械人，一個只係收集垃圾嘅機械人，兩個都可以生情 ;  仲有生活必須有嘢調味，就算好似威e咁，每日執行收集垃圾嘅任務，都不忙從垃圾中收集佢鐘意嘅嘢黎收藏 ; 唔好跟住規範做事，要嘗試跳出框架，唔好咁死版，就好似故事裏面嘅清潔機械人，唔試過自己跳出條路線，又點知自己唔得 ; 任何嘢都有佢嘅用處，就算係壞左嘅機械人，佢都有日會幫到忙，呢個亦都係disneylan動畫最常帶出黎嘅道理。但最深刻嘅唔係呢d，而係科幻電影最常帶出嘅人類過份使用科技，唔係人類控制科技，而係科技控制人類呢個道理。

點解我會最深刻？因為呢套係一套動畫。一開頭我講過呢套係一套俾大人睇嘅小朋友動畫，係因為佢嘅表達手法唔同其他動畫，道理喺呢度唔係靠人講出黎嘅，而係要人自己發掘，自己思考出黎，如果想將信息帶俾小朋友一定唔會用咁嘅拍攝手法。故事完全冇一個人出黎同觀眾講套戲想大家收到咩信息，但從其他地方已經可以知道故事背後嘅大道理。故事初期冇人講嘢，但從周圍環境已知地球已經俾人類搞到好差，而且真係同我哋好似，包括多到覆蓋地球嘅太空垃圾，好多荒廢左嘅商場，垃圾堆積如山等等。到故事中期，兩個主角上到太空，我見到喺太空船內嘅人類因為長期唔洗自己活動而令手指腳指都退化左，每個人都用電腦傾計，甚至對方就喺隔離，亦因為科技，好多身邊嘅嘢都被忽略，仲有人類盲目跟隨潮流，但其實諗深一層一個潮流係由人安排出黎嘅，點解要盲目跟隨一個自己都有可能安排嘅潮流走勢呢？最後，就係知道任何嘢壞左都唔應該拋棄，而係學識整返好佢，好似故事裏面嘅人類最後都返去故鄉地球嘗試修理佢。

呢d都帶領觀眾作出反思，特別係成年觀眾，可能因為編劇同導演都發現科技問題漸漸出現喺下一代，而其中一個大成因就係大人，所以需要佢哋親自講解呢個道理俾自己仔女聽。咁俾大人睇嘅小朋友動畫個小朋友動畫又點黎呢？因為disneyland一直都係以小朋友作目標觀眾，所以裏面不失小朋友會鐘意嘅搞笑同其他成份。

總結，Well-e係我睇過所有disneyland動畫中我最欣賞嘅一套，無論係拍攝手法同故事，我都覺得同其他動畫所帶俾我嘅感覺唔同。我覺得其實電影目標觀眾係想小朋友開心而帶佢哋入去戲院嘅大人，得到反思之餘，亦不失娛樂，而又可以將道理帶俾小朋友。所以呢套係一套俾大人睇嘅小朋友動畫。

登山落山打邊爐返屋企訓教記

       呢幾日真係太攰啦，所以冇更新到個blog，但呢個星期其實發生左好多想寫出黎嘅事。最想講嘅係遠足之旅同日落真相電影小小感想。

       今日就講下遠足先啦，聽日再寫影評。 今次遠足，其實早喺兩個星期前已經同兩個朋友約左，同埋plan好條路線同有咩要準備，由於今次係第一次自發性遠足，所以都有少少緊張，我哋嘅路線係由寶琳行去沙田圍，順便再喺嗰度打邊爐，而路線係參考google map，冇睇錯，真係就咁就開始行，完全冇搜集過其他資料，就係咁，我哋都非常期待當日。 
       當日係十月廿九號，我哋約左九點寶琳地鐵站等，一齊食埋早餐就去超級市場買嘢，大概十點就由寶琳出發啦。果然，我哋一開始就迷路，喺將軍澳行左成粒鐘，先搵到條路嘅入口，就喺我哋好開心搵到入口之後，樓梯就喺我哋眼前出現啦，心諗，冇問題呀，行山預左要行樓梯啦，但真係低估左d樓梯，行左幾步已經攰到想返轉頭啦，而且一諗起呢條長樓梯唔係上山樓梯，只不過係上去井欄樹村，即係真正起點嘅樓梯嗰時，我真係唔敢信相之後會點。上左大概半個鐘樓梯之後，終於行到去井欄樹村，入到村終於可以行返平路，我哋繼續搵路，但我哋都已經好攰，途經一個巴士站，坐左喺張椅度休息，差d諗唔開就坐巴士走，最後意志力阻止住我哋。

       終於行到去行山路徑入口，我哋一口氣衝上去，上左一陣就keep住落樓梯，嗰度真係十分輕鬆，只係好靜同好多蚊同……冇咩聲。途中我哋見到一座西式建築而且荒廢左嘅三層大屋，喺一個人都冇嘅山上面，呢間屋變得仲恐怖，結果，我哋就喺嗰度食午餐啦，午餐有八寶粥同蛋卷，我哋快快食完就出發啦，直到行到落去最低為止。我哋keep住行，繼續前往下一個checkpoint，之後，成日最恐怖嘅嘢終於黎啦，就係要上樓梯，而且唔係上樓梯咁簡單，係上返頭先落得咁high嘅長度，唔係，可能再長d，即係上返山呀救命！冇錯，其實都只係樓梯。冇辦法，我哋硬著頭皮上山，唔夠半個鐘已經非常攰，我哋懷住希望，一定相信住下一個轉彎位應該就係山頂啦，我哋仲一度以為自己已經上到最高，大叫左一聲終於行完啦！之後轉個彎，又係另一條長樓梯，於是又大叫左一聲。我哋用盡吃奶的力上去，一時停下抖下，之後再次上山，我一生人中嘅相好似跑馬燈咁喺我腦裏面一張一張咁經過，好彩我呢排有去健身室跑步，如果唔係真係可以坐直昇機落山。上到山頂之後，我哋已經唔掂啦，坐左喺個涼亭度休息，計返先發覺我哋上左個幾鐘山，睇到路牌，仲發現我哋喺飛鵝山山頂，即係tvb劇男主角成日車女主角上去之後……嗰度。不過睇到風景之後，又覺得行左咁耐咁辛苦都係值得嘅。最後終於可以落山啦，而且終點都改變左，由沙田圍變左鑽石山……其實都差唔多姐，哈。

計埋計埋，我哋大概行左五個鐘山，真係好辛苦左，尤其是係我呢d咁嘅肥仔，完全低估左呢個活動，夜晚就係沙田圍邊爐之夜，但係大家都攰到講唔嘢啦，所以好早就返左屋企休息，唉！依家d後生仔真係……