焗桑拿記

       距離上次寫blog已經過左好耐，我諗係時候都要出一出現。既然今日寫，就講下尋日發生咩事啦！
       話說我呢排都有落健身室跑下步咁，由於我發現冇咩成效，所以冇乜同人講起。尋日有個知我有跑開嘅朋友黎左我嗰度hea，佢夜晚要出街食飯，又唔想返屋企，所以我就提出同我一齊健身，之後就一齊喺會所沖涼(別想太多，會所都是用洗澡液的，沒有肥皂)。其實成日最特別嘅就係健完身沖涼前嘅焗桑拿時段，本來我同個朋友都唔係好頂得順咁熱，所以唔加水落d石頭度，但係之後有個大叔入左黎，係咁加水，仲話咩唔夠熱，最後我同個朋友流左勁多汗，暫時一生人裏面最多汗嘅一次，之後就即刻衝去沖涼，爽到！果然健身室都是老練的人！

功課夜

       終於搞掂哂d功課，今次呢兩份因為早左做所以唔洗通頂完成，真係十分happy，我應該係咁多個男仔fd中最快完成嘅一個，雖然質素唔一定最好，但以一個求合格嘅人黎講，唔洗通宵做已經好好，依家我陪緊兩個朋友，等佢哋做完我先訓，佢哋做緊我就喺度打下blog。
       講開又講已經好多日冇更新個blog，一黎因為冇咩特別事發生，二黎臨近deadline我唔做唔得啦！情況十分危急，不過最後都安然渡過。如果我兩個fd要做通宵，咁我咪積係早做完都要通宵？！

超時空要塞

       今日全日做功課，陪住我嘅係macross嘅音樂，雖然係八幾年嘅歌，但聽落有種懷舊嘅感覺，而呢種感覺係其他歌冇㗎。我都係早幾日先哂macross第一輯，唔同於高達嘅係，呢套機械人動畫唔止著眼於戰爭同人性，仲有音樂同三角戀，難怪佢可以喺當年咁多機械人動畫中突圍而出！
       我前幾日先睇哂，今日聽返d音樂已經好懷念好感動，不其然諗起細細追動畫，唔知當年已經追緊依家已經係大人嘅macross迷聽返又有咩感覺呢？今年係macross二十五週年，第一輯嘅音樂同動畫都有重制，好多人重新欣賞返八幾年嘅動畫，可能心裏面會諗：時間真係過得好快，等我再次感受返我嘅童年啦。可惜嘅係，經典仍然係經典，但感覺已經唔同當年啦。

男人的浪漫

       已經好耐冇喺度打過嘢，今晚約左幾個熟d嘅中學同學食放題，去左旺角嗰間大滿喜。果然係良心放題，一開始d嘢食出得好快，快到超過我哋預期。我哋一開始因為好肚餓所以一寫寫左勁多嘢食，最後係咁出。我哋就要係咁食，咁樣張枱先有位放黎緊嘅食物……嗯，真係打杖咁。結果四十幾分鐘就食飽左我哋lu，之後都冇咩再寫嘢食。
       本來食完之後就走，之後突然决定去維港吹水，結果就開始左我哋三個單身仔嘅談心時間，內容就唔詳談啦，放喺心度就好。最後我哋一人買左支葡萄酒，對住個海講邊個先出pool就請其他嗰兩個食飯！！

唉

       今日真係好黑，話說今日返抄散，犯左抄散大忌，就係倒左杯嘢飲喺個客度，俾人鬧到七彩，真係好唔開心，尤其我一整到個客之後，我唔俾再出去，留喺廚房企喺度望住同事進進出出，我估以後應該都冇得返㗎啦，唔係因為冇得返而唔開心，係因為其他人都冇事，就係我搞到個客，我覺得我唔應該犯呢d錯，好失落。今日好想寫多d，但真係冇咩心情，就咁啦。

抄散組旅遊記

       抄散組今日終於人齊食飯啦，其實今日真係好奇妙嘅一日，由朝早開始，都好隨緣，其實我之前都有約大家今日食飯嘅，不過最後不了了之，諗住今日應該食唔成，點知隨隨便便就開始左個聚會啦。
       一切都係由呀樂屋企停電開始，因為佢唔想一個人食飯又冇電視睇，所以就喺whatsapp group問我哋食唔食飯，之後再一齊返學我反正冇嘢做，咪陪佢囉，本來細n冇覆去唔去，但後尾佢話朝早返工，所以咁啱可以同我哋食，咁樣btec抄散組就咁齊人啦，我已經覺得好奇妙，咁樣我哋三個就吹住水完成左午餐。
       返學嗰陣我哋講起元朗b仔涼粉，講下講下又賴到食牛歡喜，就係咁，我哋嘅晚餐就决定左喺元朗啦。奇妙嘅嘢又發生左，我哋本來要等埋七哥佢哋七點放學先去元朗，仲擔心會唔會太夜，咁啱佢哋朝早喺咐近有d事要做，趕唔切上堂，咁樣我哋好順利會合再前往元朗啦！
       我哋第一站係食牛歡喜，其實得兩個人食，我哋食其他牛河，嗰度食牛好出名，我見到d牛歡喜真係有少少反胃，其實唔止牛歡喜，嗰碗仲有牛春袋，牛……嗰d部分，詳細唔講。好早食完就去第二站，b仔涼粉！我哋用左一粒鐘去搵，就係因為信左住咐近嘅Oscar同細n，搵到嗰時發現原來好近地鐵站，不過咁樣都係一種趣味。我哋叫左勁多甜品，仲有最大盆嘅b仔涼粉，最離譜係我哋仲叫左熟食，最後當然食唔哂，又喺度賴黎賴去，又話係邊個叫嘅邊個想食嘅，咁樣講下講下就走左啦。最後一站我哋坐左喺公園傾計，傾下少男心事，傾下我覺得只有男仔先講得嘅話題，仲第一次俾警察查身份證。
       今日真係好難得，希望第時可以多d人齊一齊出黎玩。

親戚黎左香港，睇完醉爆伴郎團

       今日表哥表姐黎左香港諗住買d嘢，之後就黎左我哋屋企坐下，佢哋都係二十幾歲，應該同我冇咩代溝，但係我發現我根本就唔敢同佢哋面對面，我亦都冇特登搵話題講，今日加埋加埋都唔知同佢哋有冇十句。佢哋走左我就喺度諗，其實我嘅社交能力係有問題㗎，我有咁多朋友可能都係因為佢哋努力維繫住，咁樣就解釋到我一同一班朋友冇見好耐，關係就疏遠好多好多，甚至只從分開之後就一句都冇溝通過，呢d其實好唔尋常。我發現自己有可能冇咩慾望去結識友誼，咁樣都可能係因為我冇咩自信心。
       啱啱睇完醉爆伴郎團第三集，其實真係睇到有d驚喜同感動。今集嘅風格同上兩集好唔同，已經唔再係一覺訓醒之後再搵返之前發生咩事，但係成套戲其實一直令我哋回想返前幾集，除左有時有d之前嘅片段外，人物大部分都係上兩集出過嘅。笑位當然唔會比上兩集少，甚至我覺得比上兩集好笑。至於感動嘅係，今集最後終於到艾倫結婚啦，三集以黎佢一直都係一個伴郎，而經過左三集嘅經歷，佢終於搵到佢嘅伴侶，戲裏面主角嗰三個人一路行去結婚現場嘅時候，不時加插前兩集三人同一樣一齊行嘅片段，雖然動作一樣，但可以睇到大家都改變左好多，尤其是艾倫，咁樣呢個系列總算俾到我哋一個真正嘅完結。(唔計片尾佢哋又再一覺醒返唔知發生咩事。)